يا انتخابات يا طوارئ

بعد إعلان حالة الطوارئ (اللي لم تنتهي أصلا), إزاي أقدر اثق في قدرة المجلس على إدارة انتخابات نزيهة . وبعدين هو ليه أصلا إعلان حالة الطوارئ .. إيه الجديد .. موقف السفارة ؟! ماهو لإن ده غباء سياسي أصلا يا إما قمة الذكاء لاجبار الناس على تقبل حالة الطوارئ .. وفين وعد المجلس زمان بـالغاء حالة الطوارئ قبل انتخابات مجلس الشعب بـشهرين .. ده مش الوعد الوحيد الذي لم يوف به المجلس . فيه نقل السلطة في 6 شهور .. وفيه انتخابات في شهر 9 .. بعد كده اتأجلت  لشهر 10 أو 11 .. بعد كده غير معلوم .. بعد كده فرض حالة الطوارئ قبل الانتخابات اللي مش معروف امتى لسة أصلا .. وكمان حالة الطوارئ إلى يونيو 2012 .. يا سلام .. ده 9 شهور كده .. يعني فتح مجال لنوعين من الشك:

1. إن الانتخابات بعد يونيو 2012 ودي كارثة.
2. إن انتخابات مجلس الشعب وبعدين الشورى وبعدين الرئاسة هتتم في وجود حالة الطوارئ .. حتى الرئيس القادم هيتولى منصبه في ظل وجود حالة الطوارئ. ده كده المجلس عدّى حدود منصبه بـزيادة وتعدى على شخص غير موجود أصلا.

 ده غير كمان إن الإعلان الدستوري اللي شغال دلوقتي بيقول إن من حق الرئيس إعلان حالة الطوارئ لمدة 6 شهور فقط بعد كده لازم استفتاء شعبي. الله عليك يا مجلس .. وادي وعد كمان لم ينفذ بل وخرق قانون واضح وصريح ودي كمان كانت مادة فالإستفتاء .. فـيقوم يعلن حالة الطوارئ ل 9 شهور كاملة. ووجود الإنتخابات في ظل وجود حالة الطوارئ هيسمح بالشك في نتيجة الانتخابات وهيفتح المجال للشرطة تلعب زي بظبط انتخابات مجلس الشعب 2010.

أنا قلت  لا للتعديلات ومازلت مقتنع بيها .. بس رأي الشعب بان ولازم احترمه .. بـغض النظر من استفزاز قوى نعم للناس اللي قالوا لا .. لكن المهم هو إن ده رأي الشعب دلوقتي .. طيب فين الخطة لتنفيذ رأي الشعب .. يعني 77 % من رأي الشعب لم ينفذ ومش عارفين هينفذ امتى .. تلات اربع الشعب قالوا نعم للتعديلات الدستورية .. وهم هم اللي رأيهم متنفذش .. ولو اتنفذ يا هيبقى في ظل قانون طوارئ وإما إن شاء الله بعد يونيو 2012 ..طيب يعني أنا شخص قلت لا .. ولما تقبلت رأي الشعب اللي قال نعم .. وقلت يلا بقى نشتغل على نعم دي .. ويلا ننقل السلطة بالطريقة دي لأن رأي الشعب هو سيد القرار هنا .. برده لقيت إن ده في علم الغيب. مش معنى إن الناس اللي قالوا لأ طالبوا بالانتخابات معناها اقتنعوا بـرأي نعم .. لكن معناها تقبل قرار نعم وبيطالبوا بـتنفيذها .. وبرده مش عارفين امتى مع إنه من حق الشعب

وده في رأيي آخر خرق من المجلس لمبادئ الديمقراطية والاستهانة بـرأي الشعب ورفض صريح من المجلس للإعتراف بـسيادة الشعب وإن لا سيادة غير سيادته. ولو كان ده غلط .. وأتمنى ذلك .. ولكن قراراته وتصرفاته هي اللي فتحت مجال للشك ده جوايا.

ويوم ما اتزنق والناس قفشت إن حالة الطوارئ لم تلغى كي تعلن .. قالك لأ أصل دي قوانين جديدة .. وزود الطينة باللة .. كان فاكر إن الشعب أهبل للمرحلة دي يا إما فعلا مش واخد باله ودي تبقى كارثة ..

أتمنى إن شاء الله هدف الاصلاح السياسي يتحقق لإن لابد من اصلاح سياسي عشان نقدر نحقق باقي الاصلاحات.